Është bërë i mundur arrestimi i një shtetaseje me rrezikshmëri të lartë shoqërore, saktësisht një 46-vjeçare e dënuar në Greqi me 20 vite burg, për veprën penale “Vrasja me paramendim”. Bëhet fjalë për Irena Kostaki (Zeria), 46 vjeçe banuese në fshatin Miras në Devoll, e cila më datë 28 gusht të vitit 1995 në Diles në Greqi, ka vrarë duke e mbytur me duar, vajzën e saj 9-muajshe dhe më datë 5 mars të vitit 1997 është arratisur nga Qendra e Paraburgimit të Femrave në Koridhalo në Greqi, ku ka qenë me masë sigurie. Për të është caktuar masa e sigurisë “Arrest në burg”, për veprën penale “Vrasja me paramendim”. Gjykata e Lamias në Greqi me vendim penal të formës së prerë, e ka dënuar këtë shtetase me 20 vite burg, për veprën “Vrasja me qëllim”, sipas legjislacionit grek, e cila korrespondon me veprën penale “Vrasja me paramendim” të Kodit Penal të Republikës së Shqipërisë. Masa e sigurisë nga Gjykata e Rrethit Gjyqësor në Korçë është caktuar për efekt të njohjes së vendimit të Gjykatës së Lamias, Greqi.