Top News – Vrau tetë persona në qendrën tregtare/Identifikohet autori, mes viktimave edhe një fëmijë

Autoritetet në Teksas kanë identifikuar autorin e vrasjes së tetë personave, mes të cilëve edhe një fëmijë, në një qendër tregtare në Dallas. Sulmuesi është identifikuar si Mauricio Garcia, 33 vjeç. Garcia, banor i Dallasit, u vra nga një polic, në vendin e ngjarjes. Presidenti amerikan, Joe Biden, e quajti sulmin si “aktin e fundit të dhunës me armë zjarri që ka shkatërruar kombin tonë”. Mediat amerikan cituan hetuesit të kenë thënë se Garcia mund të ketë patur lidhje me të djathtën ekstreme, siç sugjerohej edhe nga logot që kishte të vendosura në rrobat e tij. Ai përdori një armë të tipit AR-15 dhe kishte të vendosur një logo ku shkruante RËDS, shkurtesë për “Skuadrën e Vdekjes të Krahut të Djathtë”, që besohet se është grup neo-nazist. Sipas dëshmitarëve, sulmuesi i armatosur kishte dalë nga makina e tij në parkingun e qendrës tregtare dhe kishte nisur të qëllonte drejt qytetarëve. Gjashtë persona vdiqën në vendin e ngjarjes, ndërkaq dy të tjerë humbën jetën më pas në spital. Të paktën edhe tre persona vazhdojnë të jenë në gjendje kritike. Garcia po ashtu kishte me vete një pistoletë, ndërsa armë të tjera u zbuluan në makinën e tij. Garcia raportohet se kishte punuar si roje sigurimi dhe nuk kishte ndonjë të kaluar kriminale. Pas kësaj ngjarjeje që ndodhi të dielën, presidenti Biden urdhëroi që flamujt amerikanë të uleshin në gjysmë shtizë në të gjitha ndërtesat federale ndërsa i bëri thirrje edhe një herë republikanëve të mbështesin planet për kontroll më të rreptë të armëve. Sipas të dhënave, SHBA-ja ka numrin më të lartë të vdekjeve nga armët e zjarrit se çdo shtet tjetër i zhvilluar. Më 2021, 49.000 persona humbën jetën nga armët e zjarrit, ndërkaq një vit më herët ky numër ishte 45.000.