Prokuroria e Elbasanit ka përfunduar hetimet dhe ka dërguar në gjyq Donald Hoxhën, për veprën penale ‘Vrasje me paramendim’. Në kuadër të hetimeve, prokuroria arriti në përfundimin se Donald Hoxha ka kryer veprën penale “Vrasja me paramendim” e kryer në bashkëpunim ndaj viktimës Roland Rexhepi, ish-efektiv policie. Prokuroria pranë Gjykatës së Shkallës së Parë Elbasan vijon hetimet në lidhje me zbulimin dhe identifikimin e bashkëpunëtorëve të tjerë të mundshëm në lidhje me këtë krim të ndodhur në vitin 2009. Ish-efektivi, i njohur ndryshe edhe si “Doda” u ekzekutua me dy armë tip kallashnikov mëngjesin e 22 korrikut pranë banesës së tij teksa po shkonte te parkingu ku kishte makinën. Donald Hoxha akuzohet se ne krim bashkëpunoi me dy persona të tjerë për vrasjen e efektivit. Dy vite më vonë pas vrajses së efektivit, Roland Rexhepi, në qytetin e Elbasanit, u ekzekutua edhe vëllai I tij, biznesmeni Ilir Rexhepi. I akuzuari për vrasjen e tij, Donald Hoxha, u ekstradua nga Britania e Madhe në prill të vitit 2024.