Arrest me burg ka vendosur Gjykata e Elbasanit për ish efektivin e polcisë Koço Buzo i cili qëlloi për vdekje dy ditë më parë bashkëshorten e tij Liljana Buzo 54 vjeçe. Prokurori Petref Asllani kërkoi masën arrest me burg dhe këtë masë vendosi edhe kryesuesi i trupës gjykuese, gjyqtari Bujar Musta. 58 vjeçari Koço Buzo dy ditë më parë qëlloi me breshëri kallashnikovi bashkëshorten e tij, Liljana Buzo, e cila për shkak të plagëve të marra ndërroi jetë në spital. Nga breshëritë e plumbave, përveç bashkëshortes, mbetën të plagosur Adriatik Kola, që ishte duke kaluar rastësisht në momentin e ngjarjes dhe avokati i së ndjerës Gëzim Toçila. Çifti i bashkëshortëve ishte në proces divorci dhe sapo kishin dalë nga gjykata e Elbasanit kur ndodhi ngjarja. Liljana Buzo kishte kërkuar urdhër mbrojteje në gjykatë pasi dhunohej në mënyrë të vazhdueshme nga bashkëshorti dhe kjo duket se ka qenw edhe shkaku kryesor që po i çonte ata drej ndarjes. Mësohet se ngjarja ka ndodhur për shkak të xhelozisë që autori kishte për të shoqen. Gjithcka ka nisur pas vendimmarrjes së gjykatës. Në debat e sipër, jashtë godinës, Koço Buzo është larguar para të gjithëve, duke u futur në banesën e tij, e cila ndodhej aty pranë. Atje ka marrë një armë zjarri tip kallashnikov dhe ka nisur që të qëllojë. Autori i krimit u arrestua në flagrancë edhe pse tentoi që të largohej.