Gjykata e Apelit të Tiranës ka dënuar me 12 vite burg të riun Aksel Hoxhaj, duke ulur me 6 vite vendimin e Shkallës së Parë që e kishte dënuar fillimisht me 18 vite heqje lirie. Vendimi ka shkaktuar tension të fortë në sallën e gjyqit, ku familjarët e viktimës, 20-vjeçarit Stiven Toshkëzi, reaguan ashpër ndaj uljes së dënimit. Policia ndërhyri për të shmangur përplasjet dhe shoqëroi në komisariat nënën e të ndjerit, vëllanë dhe kunatën e tij. Vrasja e Stiven Toshkëzit, e ndodhur më 18 prill 2023 pranë gjimnazit “Partizani” në Tiranë, ku dyshohet se ka qenë rezultat i një konflikti të mes tij dhe Aksel Hoxhajt. Sipas hetimeve, përplasjet mes të rinjve kishin nisur për shkak të një vajze me të cilën Toshkëzi ishte në një lidhje. Më herët, dy të rinjtë ishin konfliktuar fizikisht pasi Hoxhaj dyshohet se e kishte ngacmuar të dashurën e 20-vjeçarit.