Ka dëshmuar para grupit hetimor Kostandin Vogli, një nga të rinjtë e përfshirë në sherrin që përfundoi tragjikisht me vrasjen e 66-vjeçarit Rexhep Ismaili në Sarandë. Ai ka deklaruar se konflikti me Viktor Ruçin, ka nisur për shkak të mosmarrëveshjeve lidhur me administrimin e një lokali plazhi. Sipas dëshmisë së tij, Vogli ka treguar se më herët kishte qenë i arrestuar dhe, gjatë kohës që vuante dënimin, Ruçi kishte larguar vëllain e tij nga biznesi, duke përshkallëzuar konfliktin mes tyre. Ai ka theksuar se përplasjet kishin në qendër ndarjen e të ardhurave nga aktiviteti dhe moszbatimin e marrëveshjes që kishin pasur mes tyre. “Ne kishim një marrëveshje, por ai nuk e zbatoi. Pasi u burgosa, Ruçi nxori vëllain tim nga biznesi. Konfliktet tona nisën për paratë e biznesit. Shkuam për t’u sqaruar pasi disa ditë më parë debatuam për këtë çështje dhe nuk arritëm të gjenim një zgjidhje më shmangej dhe atë natë mora vesh që ishte në lokal”-deklaroi ai. Ngjarja ndodhi mbrëmjen e 7 majit në fshatin Gjashtë. Rexhep Ismaili, i njohur në zonë si pronar i një karburanti dhe lokalit “Vëllezërit Ismaili”, mbeti i vrarë brenda ambientit të biznesit të tij pas një konflikti të dhunshëm. Një grup personash kanë shkuar në lokalin e viktimës dhe janë drejtuar te tavolina ku ndodheshin Viktor Ruçi i shoqëruar nga viktima dhe persona të tjerë të pranishëm duke filluar menjëherë konfliktin me sende të forta. Gjatë konfliktiti, viktima ka marrë një armë zjarri automatike dhe ka qëlluar në drejtim të personave të tjerë. Sipas policisë, ka qenë Lulzim Tabaku, i cili ka qëlluar me armë zjarri pistoletë në drejtim të Rexhep Ismailit, i cili ndërroi jetë në vendngjarje. Pas krimit, autorët janë larguar me shpejtësi nga zona. Në vendin e ngjarjes është gjetur dhe sekuestruar një automjet luksoz Audi Q8, i cili dyshohet se u përket personave të përfshirë në konflikt. Rexhep Ismaili ishte një emër i njohur në zonën e Sarandës. Përveç karburantit dhe lokalit “Vëllezërit Ismaili”, ai dhe vëllai i tij kishin në pronësi edhe plazhin e njohur Pema e Thatë në Ksamil. Gjithashtu, ai mbante edhe detyrën e drejtuesit të Shoqatës “Çamëria”, dega Sarandë.