Vrasja e efektivit të policies, Xhulio Prela, mëngjesin e së shtunës në autostradën Lezhë-Milot vijon të mbetet pa autor. Hetimet po vazhdojnë në mënyrë intensive dhe burime bëjnë me dije se organet hetimore kanë shtënë në dorë filmimet e një kamere sigurie, e cila mund t’i ndihmojë në zbardhen e ngjarjes. Xhulio Prela është ekzekutuar në një pritë pranë fshatit Gajush në Lezhë. Kamera e sigurisë e një biznesi pranë vendit të ngjarjes ka fokusuar momentin kur Xhulio Prela është afruar dhe ka biseduar me njërin nga personat që ndodheshin aty dhe më pas është qëlluar me armë zjarri. Ende nuk dihet nëse nga këto pamje ka mundësi të identifikimit të autorëve, por falë tyre hetuesit kanë mundësi të krijojnë një kronologji të saktë, për të ndjekur më pas nëpërmjet kamerave të tjera të sigurisë përgjatë rrugës nga janë larguar autorët e vrasjes, duke shtuar mundësitë e identifikimit të tyre. Mësohet se efektivi i policies, pasi kishte dërguar një të afërm në fshatin Pistull të Shkodres, ishte nisur në drejtim të Tiranës, por pas një telefonate ai është kthyer, duke shkuar drejt vendit ku i ishte ngritur prita nga vrasësit. Deri më tani dihet se Xhulio Prela ka komunikuar me dikë nga personat që ishin aty pranë një makine të ndaluar. Më pas ai ka tentuar të largohet me makinë por është qëlluar me armë zjarri dhe një plumb e ka marrë në jaharor, duke i marrë dhe jetën. Makina ka përfunduar jashtë rruge në një parcel, çka bëri që fillimisht vrasja të raportohej si aksident rrugor. Ende nuk është e qartë arsyeja e ekzekutimit të efektivit të policisë, pasi familjarët e shokët e Xhulios kanë deklaruar se ai nuk ka pasur asnjë konflikt apo të ketë shprehur ndonjë shqetësim. Gjithsesi, për momentin pista kryesore që po hetohet është ajo e ndonjë konflikti personal që mund të ketë pasur 26-vjeçari me ndonjë person gjatë ditëve të fundit.