Të akuzuarit për vrasjen e Liridona Ademajt- Naim Murseli, Granit Plava dhe Kushtrim Kokalla, nuk e kanë pranuar këtë të mërkurë (04.06.2025) aktakuzën për vrasjen e 30-vjeçares në nëntor të vitit 2023, në Gjykatën Themelore të Prishtinës. Murseli, i akuzuar për vrasjen e bashkëshortes, teksa është deklaruar i pafajshëm për akuzat, ka thënë se nëse vërtetohet aktakuza ndaj tij, “atëherë ai vetë do të kërkojë dënim me burgim të përjetshëm”. Granit Plava u mbrojt në heshtje, ndërsa Kushtrim Kokalla u deklarua i pafajshëm. Prokuroria tha se ka një numër të madh provash për akuzat e ngritura, si dhe deklaratat e të akuzuarve të dhëna për Policinë e Kosovës.