Gjykata e Gjirokastrës ka liruar nga qelia tre të ndaluarit për vrasjen e 30-vjeçarit Endri Goxhaj në Memaliaj mbrëmjen e 21 prillit. Trupi gjykues vendosi masën e sigurisë “arrest shtëpie” për Dali Nelën, vjehrrin e tij Aldo Kalemi dhe Ermal Matajn. Sipas prokurorisë, sherri ka nisur mes dy personave që nuk ishin pjesë e asnjë grupi rival. Më pas kanë ndërhyrë personat e arrestuar. Viktima, Endri Goxhaj, në këtë moment ka nxjerrë pistoletën dhe ka shtënë në drejtim të Dali Nelës, duke e lënë atë të plagosur. Më pas u kundërpërgjigjën dy vëllezërit e Dali Nelës, Donaldoja dhe Marjoldoja të cilët hapën zjarr në drejtim të 30-vjeçarit duke e lënë atë të vdekur në vend. Dy vëllezërit Nela, tashmë në kërkim, morën me makinë vëllanë e plagosur dhe e dërguan atë drejt spitalit ku dhe më pas u larguan me shpejtësi duke humbur gjurmët. Ermal Mataj akuzohet për veprën penale "Veprime që pengojnë zbulimin e të vërtetës" teksa dyshohet se ka fshehur armën me të cilën është qëlluar në drejtim të Goxhajt.