Hetimet për vrasjen dhe zhdukjen e një berberi italian në Pulja kanë zbuluar një rrjet të organizuar pastrimi parash mes Italisë dhe Shqipërisë. Antimafia italiane dhe SPAK kanë ndërmarrë një operacion të përbashkët nën koordinimin e Eurojust. 14 urdhër-arreste janë nxjerrë në të dyja anët e Adriatikut, 10 nga SPAK dhe 4 nga antimafia italiane. Hetimet kanë identifikuar të paktën pesë persona që dyshohen për pastrim parash, ku një rast dyshohet kapja e 700 mijë eurove në pikën e kalimit kufitar të Muriqanit në Shkodër. Rasti u hetua fillimisht nga prokuroria e Shkodrës, por çështja i kaloi më vonë Prokurorisë së Posaçme pas zbulimit se pas këtij aktiviteti fshihej një grup i strukturuar kriminal. Grupi italo-shqiptar është zbuluar pas vrasjes së berberit Francesco Diviesti, 26 vjeç në prill të vitit të kaluar. I riu dyshohet se ka pasur lidhje me grupin e pastrimit të parave. Hetimet e antimafias italiane kanë zbuluar indicie se ai mund të jetë përdorur prej këtij grupi për të pastruar paratë e drogës në Itali, por edhe për transferimin e tyre në Shqipëri.