Sipas të dhënave të fundit nga NASA, shanset që një asteroid të godasë Tokën në vitin 2032 tani janë 1 në 32, ose 3.1 për qind. Më 7 shkurt, NASA rriti gjasat që asteroidi të godasë Tokën nga 1.2 përqind në 2.3 përqind. Më pas probabiliteti shkoi në 2.6 për qind dhe së fundmi u përditësua në 3.1 për qind, sipas Qendrës së NASA-s për Studimet e Objekteve Afër Tokës. Shkencëtarët kanë ndjekur vazhdimisht asteroidin, 2024 YR4, që kur u zbulua për herë të parë më 27 dhjetor. NASA vlerëson se asteroidi ka një diametër prej40 deri në 90 metra. Agjencia tha se asteroidi mund të godasë Tokën më 22 dhjetor 2032. Ajo e vendosi 2024 YR4 në një listë rreziku pasi probabiliteti i goditjes së asteroidit kaloi 1 për qind më 27 janar, duke sjellë një njoftim zyrtar nga Rrjeti Ndërkombëtar i Paralajmërimit të Asteroideve. Korridori i rrezikut për 2024 YR4, rajoni i Tokës që mund të preket, përfshin Oqeanin Paqësor lindor, Oqeanin Atlantik, Detin Arabik, Afrikën, Azinë Jugore dhe pjesë të Amerikës së Jugut. Ai rajon përfshin disa nga qytetet më të populluara në botë, duke përfshirë Bogotanë në Kolumbi, Mumbain dhe Chennain në Indi dhe Lagosin në Nigeri. Tani për tani, 2024 YR4 po largohet nga Toka por shkencëtarët do ta monitorojnë atë deri në prill dhe më pas përsëri në qershor 2028, kur të kthehet në afërsi të Tokës. Ndërsa shkencëtarët vazhdojnë studimin e trajektores së asteroidit dhe kuptojnë më mirë orbitën e tij, probabiliteti që ai të godasë Tokën ka të ngjarë të zvogëlohet.