Grupi i parë prej 200 të burgosurish shqiptarë që do të riatdhesohen nga Britania e Madhe përbëhet nga persona që janë dënuar me akuza nga kultivimi i hashashit e shpërndarja e drogës, te vrasës serial. Mediat britanike kanë siguruar disa emra në listën e parë të atyre që do të vuajnë dënimin në burgjet shqiptare, sipas marrëveshjes së nënshkruar mes dy qeverive. Në listë, thotë ‘The Telegraph’ janë 17 vrasës, mes të cilëve edhe Mane Driza, 45-vjeç i njohur me pseudonimin ‘Scarface’ dhe i dënuar si vrasës serial. Ai është gjetur fajtor për pesë vrasje dhe gjykatat britanike e kanë dënuar me 336 vite burg. Ai do të deportohet sipas një marrëveshjeje të ratifikuar javën e kaluar, ku Britania do t'i paguajë Shqipërisë 4 milionë paund në vit për të rimarrë 200 nga kriminelët më të rrezikshëm shqiptarë të burgosur për vepra penale, përfshirë vrasjen, përdhunimin, vjedhjen me banesa dhe tregtimin e drogës. Ata do të kryejnë të njëjtën kohë dënimi siç do të kishin bërë në Britaninë e Madhe. Dy nga pesë vrasjet e Drizës janë bërë në Shqipëri në vitin 1997, kur ekzekutoi babë e bir. Më pas u arratis drejt Britanisë së Madhe me një emër të rremë. Në 1999 vrau në ishull shqiptarin Stefan Mone, duke e goditur 120 herë me thikë dhe sëpatë. U largua nga Britania e Madhe në drejtim të Siçilisë, ku gjashtë muaj më vonë vrau dy persona të tjerë pas një zënke në lokal.