Me 106 vota pro dhe vetëm 2 kundër, maxhoranca e opozita miratuan ndryshimet në Kodin Zgjedhor që i hap rrugë votës së emigrantëve si dhe vendos që 1/3 e listave të jetë e caktuar nga kryetarët e partive dhe 2/3 e tjera të jenë të hapura. Kundër kësaj marrëveshje të arritur në grupin e dialogut, votuan kundër në tërësi Enkelejd Alibeaj dhe Dashnor Sula, të cilët e patën deklaruar votën e tyre që gjatë debateve për këto ndryshime. Të pranishëm gjatë votimit në tërësi ishin edhe 30 deputetë të tjerë, të cilët refuzuan marrëveshjen në heshtje. Sipas kritikëve, listat nuk po hapen, por thjeshtë po manipulohen shqiptarët, pasi pjesa kryesore e kandidatëve do të caktohen nga kryetarët e partive apo strukturat e tyre drejtuese. Gjatë votimit në parim, kundër kësaj marrëveshje votuan 8 deputetë të opozitës, përkatësisht Lulzim Basha, Enkelejd Alibeaj, Saladin Jakupllari, Merita Bakiu, Dashnor Sula si dhe aleatët Fatmir Mediu, Agron Duka dhe Dashamir Shehi. Ndërkohë edhe pse të pranishëm në sallë, nuk votuan 25 deputetë të opozitës, duke treguar në heshtje mosdakordësinë e tyre me marrëveshjen, që për shumë analistë dhe deputetë, forcon pozitat e kryetarëve dhe u jep atyre të drejtën e përzgjedhjes së kandidatëve për deputetë. Po ashtu, krahas të drejtës së votës për emigrantët, u miratuan edhe amendamentet e grave deputete, të cilat kërkuan që 1 në 3 deputetë të jetë grua, për të ruajtur kështu kuotat gjinore.