Partia Demokratike i ka dërguar Komisionit Qendror të Zgjedhjeve një shkresë me dy sugjerimet e saj për qarqet ku kërkon të aplikohet projekti pilot për numërimin elektronik dhe ato jane Fieri dhe Korça. Ndërkohë burimet thonë se PS nuk ka dërguar asnjë propozim pas kërkesës së kryetarit të KQZ, Ilirjan Celibashi, por paraprakisht thonë janë të hapur për të pranuar propozimet e dërguara nga Partia Demokratike. Celibashi në kërkesën e tij, theksoi se projekti pilot për teknologjinë në zgjedhje do zbatohet në 20% të zonave. Për të vendosur se në cilat zona zgjedhore do zbatohet projekti pilot për të mundësuar numërimin dhe votimin elektronik, do duhet konsensusi i palëve politike. KQZ iu dërgoi letër 8 partive për implementimin e teknologjisë në zgjedhjet 2021. “KQZ-ja ka kompetencë të eksplorojë, eksperimentojë dhe të vendosë përdorimin në zgjedhje të sistemeve ose pajisjeve të teknologjisë së informacionit, për të mbuluar aspektet dhe/ose procedurat të veçanta të procesit zgjedhor, të angazhojë konsulencën e huaj për këtë qëllim, si dhe të prokurojë sisteme apo pajisje të teknologjisë së informacionit apo edhe të shërbimit të operimit të tyre. KQZ-ja është e detyruar që të përdorimin e sistemeve dhe ose pajisjeve të teknologjisë së informacionit ta zbatojë në zgjedhje nëpërmjet projekteve pilot, në jo më pak se 10% të numrit të zgjedhësve për çdo fazë të implementimit”, shkruhet ndër të tjera në letrën e KQZ-së drejtuar partive politike.