TikTok ka rënë dakord t’i paguajë 400 milionë dollarë qeverisë amerikane për t’i dhënë fund një procesi gjyqësor, në të cilin platforma akuzohej se kishte shkelur privatësinë e fëmijëve. Çështja lidhet me një padi të ngritur në vitin 2024 nga Departamenti amerikan i Drejtësisë, gjatë administratës së ish-presidentit Joe Biden. Autoritetet amerikane akuzuan TikTok dhe kompaninë mëmë ByteDance se kishin mbledhur “sasi të mëdha të dhënash” nga miliona përdorues nën moshën 13 vjeç. Sipas padisë, kjo përbënte shkelje të ligjit federal për mbrojtjen e privatësisë së fëmijëve në internet, i njohur si COPPA, i miratuar në vitin 2000. Në bazë të marrëveshjes, TikTok dhe ByteDance do t’i paguajnë menjëherë Departamentit të Drejtësisë 300 milionë dollarë, ndërsa 100 milionë dollarët e tjerë do të paguhen pasi qeveria amerikane të tërheqë një marrëveshje të vitit 2019 me Komisionin Federal të Tregtisë. TikTok dhe ByteDance kanë pësuar ndërkohë ndryshime të rëndësishme në pronësi, politikat e privatësisë dhe kontrollet për përdoruesit e rinj.