Një deputet ukrainas dhe zyrtarë tjerë janë arrestuar pasi agjencitë shtetërore kundër korrupsionit kanë zbuluar atë që e kanë quajtur skemë të gjerë ryshfeti gjatë blerjes së dronëve dhe sistemeve tjera elektronike për luftë. Presidenti ukrainas, Volodymyr Zelensky tha përmes një postimi në X se një deputet ukrainas, krerë distriktesh dhe administratash civile dhe disa pjesëtarë të Gardës Kombëtare janë përfshirë në rastin që ka të bëjë me kontratat shtetërore me furnizuesit, të cilat dyshohet se janë nënshkruar me çmim 30 për qind më të lartë. Zelensky shkroi se do të ketë “zero tolerancë” për korrupsionin në Ukrainë, dhe falënderoi agjencitë për punën e tyre. Pavarësia e agjencive ukrainase kundër korrupsionit u rikthye të enjten, pas protestave mbarëkombëtare. Qeveria e Zelenskyt u përball me kritika të ashpra pas prezantimit të një projektligji që do t’i hiqte pavarësinë Byrosë Kombëtare kundër korrupsionit dhe Zyrës së Prokurorit të Specializuar për çështje kundër korrupsionit. Presidenti tha se agjencitë duhet të pastrohen fillimisht nga ndikimi rus dhe tentoi t’i japë autoritet prokurorit të përgjithshëm për të vendosur se kush duhet gjykuar në rastet e korrupsionit në nivele të larta. Ky hap u pa si kthim mbrapa në luftën kundër korrupsionit në Ukrainë, duke rezultuar në protestat më të mëdha kundër Qeverisë që kur Rusia nisi luftën në Ukrainë më 2022. Duke parë zemërimin e publikut, Zelensky propozoir një projektligj të ri për të rikthyer pavarësinë e këtyre dy trupave i cili më pas u votua në parlament.