Komisioni Europian publikoi raportin e procesit screening pas takimeve bilaterale në Bruksel mes institucioneve shqiptare dhe atyre europiane. Në dokumentin prej 135 faqesh konstatohen problematika në luftën kundër korrupsionit, parimeve demokratike dhe financimeve të partive politike, megjithatë nënvizohet progresi i deritanishëm i Shqipërisë në kapitujt e procesit screening. Në dokument thuhet se duhet të rishikohet ligji për financimin e partive politike dhe fushatave zgjedhore, të caktohen kufijtë e donacioneve, dhe të garantohet që partitë të tregojnë transparencë të plotë për të ardhurat dhe shpenzimet para ditës së zgjedhjeve. Sipas Bashkimit Europian, kapacitetet e KQZ-së për monitorimin e financave të partive politike mbeten të ulëta, pasi duhet një regjim auditimi më rigoroz.