Kush ka dalë i papunë për shkak të krizës nga Covid-19, për periudhën 10 mars deri më 23 qershor, mund të bëhet pjesë e programit të qeverisë për t’u punësuar në sektorin privat. Në mbledhjen e fundit qeveria miratoi vendimin me procedurat dhe kriteret që duhet të plotësojë biznesi dhe individët e papunë për t’u bërë pjesë e programit të punësimit. Vendimi përcakton se personat e dalë të papunë në periudhën kohore nga 10 marsi deri më 23 qershor, duhet të jenë të evidentuar nga Drejtoria e Përgjithshme e Tatimeve dhe të regjistruar në zyrën e punës. Duhet theksuar punëkërkuesi mund të marrë pjesë vetëm një herë në këtë program të punësimit. Programi i punësimit është një program 4, 8 ose 12-mujor punësimi, në të cilin profili dhe nevojat e punëkërkuesit përshtaten me vendin e lirë nga punëdhënësi. Paga përcaktohet në kontratën e punës, në përputhje me pozicionin përkatës dhe nivelin e pagave në treg, por shteti ndërhyn edhe merr përsipër disa subvencione shumë të rëndësishme. Për kompanitë që punësojnë punëtorë me kontratë të paktën 4-mujore, paga minimale 26 mijë lekë do të subvencionohet nga shteti për një periudhë 2 mujore dhe kontributet e sigurimeve shoqërore dhe shëndetësore të punësuarit për gjithë periudhën. Për programin 8-mujor të punësimit subvencionimi nga shteti i pagës minimale do të jetë për 4 muaj dhe të kontributeve për gjithë periudhën. Nëse lidhet kontratë 1-vjeçare punësimi shteti merr përsipër të subvencionojë vetëm kostot e sigurimeve të detyrueshme për 12 muaj. Ata punëdhënës që duan të bëhen pjesë e programit të punësimit duhet të plotësojnë disa kritere, siç janë të jetë i regjistruar si shoqëri tregtarë, të mos ketë shkelur ligjin e punësimit përpara shpalljes të pandemisë, vendi i punës i financuar nga ky program, duhet të vijë si rezultat i rritjes së fuqisë punëtore në aktivitetin e punëdhënësit, të mos ketë detyrime ndaj tatimeve etj.