Këto janë pamjet e përmasave të përmbytjeve që ka shkaktuar Lumi Vjosë në zonën e Vlorës, përkatësisht fshatrat Novoselë, Bishan dhe Fitore. Siç shihet nga këto pamje, uji ka izoluar disa banesa dhe ka përmbytur me dhjetëra hektarë tokë bujqësore me të mbjella. Në këtë zonë janë evakuuar 13 familje, ndërsa lajmi i mirë është se niveli i lumit po bie dhe situate po përmirësohet në disa zona, ku uji është duke u tërhequr nga banesat dhe tokat, si në Qarkun e Vlorës, ashtu edhe në atë të Fierit. Ashtu si në Durrës, edhe në këtë zona grupet e verifikimit të dëmeve kanë nisur punë në terren, duke identifikuar fillimisht dëmet nëpër banesa, elektroshtëpiake dhe orendive. Faza e dytë e verifikimeve do të kryehet për dëmet në të mbjella dhe blegtori. Autoritetet kanë këshilluar një pjesë të banorëve që të mos rikthehen nëpër banesa, ndërsa në disa zona nuk këshillohet përdorimi i ujit të rrjetit as për konsum dhe as për gatim për shkak të ndotjeve që kanë pësuar puset.