Rastet e trafikut të emigrantëve të paligjshëm që kalojnë përmes vendit tonë për të mbërritur në një vend të BE, janë të vazhdueshme. Një tjetër rast i tentativës për dhënie ndihmë për kalim të paligjshëm të kufirit, kundrejt fitimit është zbuluar nga policia kufitare e kakavijës. Por këtë radhe ai që kryente transportin e 7 emigrantëve, ishte edhe vet emigrant, një shtetas nga Bangladeshi. Policia kufitare në bashkëpunim me FRONTEX arrestoi 21 vjeçari pas informacioneve të siguruara në rrugë operative. Arrestimi i tij u bë në afërsi të fshatit Grapsh duke ndihmuar 7 emigrantë të paligjshëm nga vendet e treta, për të shkuar në drejtim të Tiranës, kundrejt fitimit 300 euro për person. Në cilësinë e provës materiale u sekuestrua një aparat celular. Materialet i kaluan Prokurorisë së Gjirokastrës, për hetimin të mëtejshëm dhe ndaj 21 vjecarit nga Bangladeshi rëndojnë akuzat për veprën penale “Ndihmë për kalim të paligjshëm të kufijve”.