Një forcë sulmuese detare amerikane me në krye anijen luftarake më të madhe në botë, USS Gerald R Ford, ka mbërritur në Karaibe, ka konfirmuar Marina Amerikane. Mbërritja e grupit sulmues, që u urdhërua të drejtohet në rajon nga Presidenti Donald Trump muajin e kaluar, vjen mes sulmeve të vazhdueshme kundër anijeve të dyshuara për drogë dhe tensioneve me Venezuelën. SHBA deri më tani kanë kryer të paktën 19 sulme kundër anijeve në Karaibe dhe Paqësorin lindor, duke vrarë të paktën 76 persona. Presidenti i Venezuelës Nicolas Maduro dhe zyrtarë të tjerë të vendit kanë akuzuar SHBA-në për "fabrikim" të një krize dhe për përpjekje për të rrëzuar qeverinë e majtë socialiste të vendit. Lëvizja e aeroplanmbajtëses vjen gjithashtu mes tensioneve mes administratës Trump dhe qeverisë kolumbiane të Presidentit Gustavo Petro, të cilin Trump e ka quajtur "një bandit dhe një djalë të keq". Petro të martën urdhëroi forcat e sigurisë publike të vendit të tij të pezullojnë ndarjen e të dhënave të inteligjencës me agjencitë amerikane derisa të ndalen sulmet me anije në Karaibe. Në një deklaratë, Marina Amerikane tha se grupi i sulmit hyri në zonën e përgjegjësisë së Komandës Jugore amerikane, që mbikëqyr Amerikën Latine dhe Karaibet, të martën. Forca përfshin aeroplanmbajtësen USS Gerald R Ford, në bordin e të cilës ka 4 mijë trupa dhe dhjetëra avionë luftarakë. Grupi përfshin gjithashtu destrojerë me raketa dhe anije të tjera lufte. Grupi i sulmit po bashkohet me forca të konsiderueshme ushtarake që tashmë janë vendosur në rajon, duke përfshirë mijëra trupa, një nëndetëse me energji bërthamore dhe avionë ushtarakë me bazë në Porto Riko. Të gjithë së bashku, ata formojnë praninë më të madhe të SHBA-së të vendosur në dhe përreth Amerikës Latine në dekada.