Një vullkan në Islandë vazhdon të nxjerrë tym dhe llavë për të dytën ditë radhazi, por era që fryn pritet të largojë gazin mbytës larg kryeqytetit Reykjavik, thanë autoritetet. Shpërthimi, i pesti që nga dhjetori, ishte më i fuqishmi në zonë që kur sistemet vullkanike në gadishullin Reykjanes u aktivizuan, tre vjet më parë, pasi kishin qëndruar në gjumë për tetë shekuj. Qyteti i Grindavikut, ku vetëm pak njerëz janë kthyer, pasi llava shkatërroi shumë shtëpi në fullim të vitit, iu nënshtrua sërish urdhërit për evakuim e po ashtu edhe laguna e famshme blu, aty pranë, një atraksion i madh turistik. Aktiviteti vullkanik u zbut mbrëmjen e të mërkurës por mbeti i qëndrueshëm gjatë natës, tha në një deklaratë agjencia e Mbrojtjes Civile. Nuk pati ndërkohë raportime për të lënduar. "Erërat perëndimore priten sot dhe ndotja nga gazi mund të përhapet më pas në lindje mbi Islandën jugore," tha agjencia. Sensorët treguan se cilësia e ajrit mbeti "shumë e mirë" brenda dhe përreth kryeqytetit, ndërsa një stacion më afër shpërthimit tregoi se ajri atje ishte "i pashëndetshëm për personat e ndjeshëm". Lava të mërkurën rrodhi mbi rrugën kryesore që shkon drejt Grindavikut dhe imazhet në mediat lokale të enjten treguan se ajo ishte pjesërisht e mbuluar nga një masë e madhe shkëmbinjsh të zinj, të tharë. Rrjedha e llavës arriti gjithashtu digat e ndërtuara rreth grindavikut, që e detyruan të devijonte në perëndim të qytetit.