Autoritetet franceze kanë arrestuar një person tjetër në lidhje me grabitjen e ndodhur më 19 tetor në Muzeun e Luvrit. Sipas mediave të huaja, i dyshuari u ndalua në Paris mbrëmjen e së mërkurës dhe po mbahet në paraburgim, pasi dyshohet se ka qenë në muze gjatë momentit të vjedhjes. Dy persona të tjerë ishin arrestuar më 26 tetor, si pjesë e një bande prej katër vetash që kreu grabitjen. Ata njihen nga policia për raste të mëparshme vjedhjesh me thyerje, dhe njëri prej tyre u kap teksa përpiqej të largohej jashtë Francës. Të dy kanë pranuar përfshirjen në ngjarje. Grabitja ndodhi më 19 tetor, kur autorët përdorën një ashensor lëvizës për t’u ngjitur në muze, thyen një dritare dhe shkuan në Galerinë Apollo dhe vodhën tetë bizhuteri mbretërore, përfshirë stolitë e Mbretëreshës Marie-Amelie dhe varëset e Perandoreshës Marie-Louise. Vlera e dëmëve vlerësohet në rreth 88 milionë euro.