Nga 1 janari i vitit që vjen, qytetarët e Kosovës do të mund të udhëtojnë drejt zonës Shengen pa viza për qëndrime afatshkurtra deri në 90 ditë. Kjo gjë u mundëson qytetarëve të Kosovës të udhëtojnë pa vizë për qëndrime si turist, për të vizituar miqtë ose familjen, për të marrë pjesë në ngjarje kulturore ose sportive, trajtim mjekësor, për programe arsimore si seminare, konferenca, shkolla verore dhe aktivitete të tjera të ngjashme. Parlamenti Evropian miratoi në prill të këtij viti vendimin për liberalizimin e vizave për qytetarët e Kosovës. Miratimi në Parlamentin Evropian u pa votim, pasi nuk kishte asnjë kundërshtim. Komisioni Evropian në vendimin për liberalizim ka sqaruar se edhe pas liberalizimit të vizave, qytetarët e Kosovës nuk do të mund të udhëtojnë në Spanjë, vend që nuk e njeh as pavarësinë e Kosovës, as pasaportat e saj. Udhëtimi pa viza nënkupton se mund të udhëtoni lirshëm në shtetet e zonës Shengen, por nuk do të mund të punoni.