Të paktën 32 persona kanë humbur jetën dhe 66 të tjerë janë plagosur pasi një vinç ndërtimi ra mbi një tren në lëvizje në verilindje të Tajlandës. Vinçi nxori trenin nga shinat dhe shtypi disa nga vagonët e tij, njëri prej të cilëve u përfshi nga flakët. Një njëvjeçar dhe një 85-vjeçar janë midis të plagosurve, ndërsa shtatë persona janë në gjendje kritike, thanë autoritetet. Zyrtarët treguan se rreth 171 pasagjerë ishin në tren kur ndodhi aksidenti rreth orës 09:00 sipas orës lokale. Hekurudhat shtetërore tajlandeze thonë se po ndërmarrin veprime ligjore kundër kompanisë së ndërtimit përgjegjëse për vinçin. Kompania italo-tajlandeze e Zhvillimit shprehu keqardhje, duke thënë se do të kompensonte familjet e të vdekurve dhe të plagosurve. Treni po udhëtonte nga Bangkoku për në provincën verilindore Ubon Ratchathani kur ndodhi aksidenti. Treni transportonte kryesisht studentë dhe punëtorë. Gazeta lokale The Nation raportoi se incidenti ndodhi ndërsa vinçi po ngrinte një pjesë të madhe betoni e cila ra mbi tren, duke shkaktuar daljen nga shinat e disa vagonëve.