Qeveria ukrainase ka bërë një bilanc të viktimave të shkaktuara që nga data 24 shkurt e deri më sot nga trupat rusë. Sipas qeverisë, deri më tani sulmet agresive kanë vrarë 18 gazetarë, 8 janë rrëmbyer dhe 3 të tjerë janë zhdukur, ndërsa ende nuk ka asnjë gjurmë nga ato. Përmes një postimi në mediat online, ministria e kulturës së Kievit, shprehet se do të kryehen një sërë hetimesh lidhur me të gjithë viktimat, vecanërisht për gazetarët. Sipas të dhënave konfirmohet gjithashtu se janë të plagosur edhe 13 gazetarë të tjerë, dhe Ministria ka konfirmuar se këto sulme do të hetohen nga autoritetet për këto krime lufte. Mësohet se gazetarët e plagosur ishin me shtetësi nga 11 vende të ndryshme përveç Ukrainës. Ndërsa ka kaluar më shumë se një muaj nga lufta në Ukrainë, trupat rusë kanë kryer një masakër në qytetin e Buchas, ku sipas shifrave janë gjendur rreth 400 civilë të vrarë dhe varrosur të gjithë në një varr masiv. Pretendohet se ky sulm do të ndikonte në rifillimin e negociatave të paqes mes Kievit dhe Moskës, por Zelensky shprehet se negociata e paqes me Rusinë duhet të vazhdojnë.