Vijon beteja për shuarjen e flakëve të zjarrit. Gjatë 24 orëve të fundit, u raportuan 34 vatra zjarri, nga të cilat pesë mbeten aktive dhe dy janë nën mbikëqyrje. Ministria e Mbrojtjes njofton se në terren janë angazhuar në total 481 forca operacionale dhe 44 automjete zjarrfikëse. Në mbështetje të strukturave vendore janë angazhuar gjithashtu 105 efektivë të Forcave të Armatosura, 2 automjete zjarrfikëse, 3 helikopterë dhe 1 avion. Vëmendja kryesore ka qenë në qarqet e Tiranës dhe Dibrës. Në Malin e Dajtit vijon puna pas riaktivizimit të tre vatrave, me angazhimin e 25 forcave zjarrfikëse dhe 20 efektivëve të Forcave të Armatosura. Në qarkun Dibër aktive mbeten vatrat në Qafë të Helmës, Vajkal, Sllatinë dhe Komsi. Në Elbasan, vatrat në Malin e Dardhës dhe Malin e Qukësit janë vënë nën monitorim dhe fatmirësisht nuk paraqesin rrezik për zonat e banuara. Gjatë ditës së djeshme pati ndërhyrje të konsiderueshme edhe në Tërbaç, Vranisht të Himarës, ku u angazhuan forca tokësore, 2 helikopterë dhe 1 avion, si dhe në Xhyrë të Librazhdit, ku ndërhyri edhe 1 helikopter i Forcave të Armatosura.