Një shtetas është vënë në pranga nga Policia e Beratit, pasi u kap me lëndë narkotike, armë zjarri dhe municion luftarak, të cilat i mbante në automjet dhe në banesë. Sakaq dyshohet se ai shpërndante doza kanabisi në zona të ndryshme të qytetit. Operacioni u zhvillua gjatë natës, në aksin rrugor “Berat-Dimal”, ku shërbimet e Policisë ndaluan një automjet të drejtuar nga 27 vjeçari, banues në fshatin Roshnik. Gjatë kontrollit fizik, iu gjet një sasi e lëndës së dyshuar narkotike canabis sativa. Më pas kontroli vijoi dhe në banesën e tij, ku u sekuestruan një tjetër sasi kanabisi, një armë gjahu, fishekë dhe një pistoletë sportive. Nga hetimet paraprake rezulton se ky shtetas siguronte lëndë narkotike, të cilën e ndante në doza dhe e shpërndante në qytet. Operacioni “Nata” u zhvillua nga Seksioni për Hetimin e Narkotikëve në Drejtorinë Vendore të Policisë Berat, në bashkëpunim me Sektorin Operacional dhe Forcën “Shqiponja”.