Policia e Vlorës pas shumë muajve kanë zbardhur 8 vjedhje banesash në Vlorë, që të gjitha të kryera në harkun e pak muajve. Gjatë operacionit të koduar “Orenditë” u arrestuan edhe dy persona me precedentë të mëparshëm penalë. Specialistët për Hetimin e Krimeve në Komisariatin e Policisë Vlorë, në vijim të punës për parandalimin e vjedhjeve, zbardhjen e atyre të ndodhura më parë dhe vënien e autorëve përpara përgjegjësisë penale, si rezultat i një pune të mirorganizuar, kanë finalizuar me sukses operacionin e kapjes së këtyre dy shtetasve në banesat përkatëse të tyre: R. A., 39 vjeç, banues në Vlorë, i dënuar më parë për vjedhje; A. B., 54 vjeç, banues në Vlorë, i dënuar më parë për vjedhje; Ndalimi i tyre u bë pasi Gjykata e Shkallës së Parë Vlorë u ka caktuar masën e sigurimit personal "Arrest në burg", për veprën penale "Vjedhja" e kryer në bashkëpunim.