Një elefant i egër, u kap në kamerat e sigurisë duke hyrë në një dyqan ushqimesh në një provincë të Tajlandës, rreth tre orë larg kryeqytetit Bangkok. Pronari i dyqanit, i vendosur pranë Parkut Kombëtar Khao Yai, thirri rojet për të nxjerrë gjigantin jashtë. "Ai erdhi për të ngrënë disa ushqime të freskëta dhe vezë në pasdite," tha pronari Attaphon Chanphon për AFP. Duket se elefanti ishte i uritur dhe kur hyri në dyqan, i mbuluar me baltë, habiti shitësin. I njohur si Plai Biang Lek, elefanti i egër ishte larguar nga parku kombëtar Khao Yai, drejt qytetit Pak Chong. Në videon e postuar në internet, pronari i dyqanit, Kamploy Kakaeë, mund të dëgjohet duke i bërtitur elefantit, ndërsa punonjësit e parkut kombëtar përpiqen ta nxjerrin jashtë atë. E patrazuar, kafsha vazhdon të hajë cfarë gjen në rafte e në dysheme. Më në fund, kafsha doli nga dyqani madje duke marrë një qese me ushqime me vete. Pronari tha se elefanti kishte ngrënë artikujt që kishte blerë atë mëngjes, duke përfshirë rreth nëntë qese me biskota orizi, sanduicë dhe disa banane. Elefantët, një simbol i mbretërisë dhe forcës në kulturën tajlandeze, vlerësohen shumë nga njerëzit në këtë vend. Por popullata e elefantëve të egër është zvogëluar gjatë shekullit të kaluar në disa mijëra, ndërsa ata janë shtyrë nga habitatet e tyre të zakonshme për shkak të zhvillimit dhe gjuetisë së paligjshme. Takimet midis elefantëve dhe njerëzve janë bërë madje të dhunshme, dhe vendi po përpiqet të balancojë mbrojtjen e publikut me ruajtjen e mirëqenies së kafshëve.