Një tjetër video ka dalë nga vrasja në Shëngjin, e biznesmenit lezhjan, Ardian Nikulaj. Në të shfaqet atentatori, që dyshohet se është portugezi Ruben Saraiva, i cili afrohet fillimisht drejt hotelit ku kreu vrasjen, por sinjalizohet të kthehet sërish mbrapsht. Duket se atentatorit i është komunikuar të tërhiqet përkohësisht, pasi në ambientin ku u krye vrasja, kishte shumë njerëz. Pas disa minutash, atentatori kthehet sërish dhe ekzekuton biznesmenin Nikulaj. Ndërkohë, në një tjetër video, shfaqet edhe një shtetas anglez, Steven Hunt, i cili ka qendruar disa ditë në hotelin e Nikulajt, ku edhe ka mbajtur nën vëzhgim atë, për të planifikuar atentatin. Të dy këta persona, bashkë me 4 të tjerë, mes të cilëve edhe shqiptari Edmond Haxhia, janë shpallur në kërkim nga Policia e Shtetit, pasi akuzohen se kanë planifikuar dhe vrarë biznesmenin Ardian Nikulaj.