Pas rreth 4 muajsh negociata, opozita e maxhoranca gjetën formulën e bashkëpunimit për amnistinë penale, për të ardhur tek seanca e kësaj të enjteje, ku do të votohej me 110 vota pro, 1 kundër e një abstenim. Por votimi i amnistisë dha disa mesazhe. Teksa Agron Shehaj, deputet nga radhët e Berishës i cili vendosi të largohej nga PD votoi kundër dhe Ermonela Felaj abstenoi, Lulzim Basha e shumica e deputetëve të tij vendosën të mos merrnin pjesë në votim, përjashtuar 2 prej tyre. Bëhet fjalë për deputeten Orjela Nebiaj dhe Eralda Tase Bano, emrat e të cilëve, Top News i solli në 13 shkurt si deputetë për të cilët flitet se po negociohet që të mund ti bashkohen grupit të Bardhit e Berishës. Ndonëse e pa konfirmuar nga deputetet në fjalë, vota e së enjtes vjen sinjali i parë në këtë drejtim.