Përvojat në zgjedhjet e kaluara lokale, kanë treguar që partitë që udhëheqin nivelin qendror të pushtetit, e transmetojnë pushtetin e tyre edhe në nivelin lokal, por një praktikë e tillë nuk ndodhi edhe në zgjedhjet lokale të 17 tetorit në Kosovë. Lëvizja Vetëvendosje, e Albin Kurtit, e cila aktualisht ka pushtetin në nivelin qendror, nuk mundi të fitonte asnjë komunë në zgjedhjet e të dielit, ndërsa në 12 komuna do të garojë në Balotazh.Sipas rezultateve preliminare të shpallura nga Komisioni Qendror i Zgjedhjeve, në 17 komuna janë shënuar fitore të partive dhe 21 komuna do të shkojnë në raundin e dytë të zgjedhjeve lokale në Kosovë. Sipas Ligjit për Zgjedhjet Lokale, raundi i dytë i zgjedhjeve ndërmjet dy kandidatëve, të cilët kanë fituar më së shumti vota të vlefshme, mbahet ditën e diel, katër javë pas raundit të parë. Në këtë rast i bie që do të mbahen më 14 nëntor.Partia që udhëheq pushtetin qendror, Lëvizja Vetëvendosje kishte shpresuar që të kishte fuqizim të saj edhe në nivelin lokal, por kjo nuk ndodhi dhe analistët kosovarë e lecojnë këtë si “një zgjim brutal nga realiteti” përballë fitores që Lëvizja Vetëvendosje e arriti në zgjedhjet parlamentare të 14 shkurtit, ku fitoi mbi 50 për qind të votave. Një nga shkaqet konsiderohet mungesa e investimeve në resurset njerëzore dhe kandidaturat për kryetarë të komunave. E pavarësisht se nuk mundi të siguronte udhëheqjen në asnjë komunë, Kurti tha se vetëvendosje është e para në zgjedhje. Duke bërë një krahasim të rezultateve me zgjedhjet e mbajtura në vite, parlamentare dhe lokale, ai thotë se vetëvendosje ka marrë më shumë vota.