Veteranët e Ushtrisë Çlirimtare të Kosovës iu përgjigjën presidentit ukrainas, Volodymir Zelensky duke thënë se deklarata e tij për mosnjohjes e pavarësisë së Kosovës, i shkon përshtat profesionit të tij si komedian përpara se të bëhej president. “Deklarata juaj anti-Kosovë në Beograd, shpërfaq profesionin tënd para se të bëheshe president! Për informacionin tuaj, lexo në vijim ngjarjet që demantojnë deklaratën tuaj, e që janë mbështetur nga të gjitha shtetet që po mbështesin përpjekjet tuaja për t'i dhënë fund pushtimit rus: Pas luftës së zhvilluar në vitet 1998–1999 dhe rezistencës së popullit të Kosovës, vendi u çlirua nga sundimi dhe regjimi opresiv i Serbisë. Bota demokratike, e udhëhequr nga Shtetet e Bashkuara të Amerikës dhe partnerët e NATO-s, ndërhyri ushtarakisht në pranverën e vitit 1999 për të ndalur spastrimin etnik dhe gjenocidin e ndërmarrë nga forcat serbe. Më 17 shkurt 2008, Kosova shpalli zyrtarisht pavarësinë e saj. Deri më sot, pavarësia e Republikës së Kosovës është njohur nga 121 shtete anëtare të OKB-së. Legjitimiteti i pavarësisë u konfirmua nga organet më të larta të drejtësisë globale.” Gjatë takimit me homologun e tij serb, Aleksandër Vuçiç, presidenti Volodymyr Zelensy u shpreh se sa i përket Kosovës, qëndrimi i Ukrainës mbetet i pandryshuar për mosnjohjen e pavarësisë. “Jemi mirënjohës ndaj Serbisë për respektimin e integritetit territorial të Ukrainës, përfshirë Krimenë” – shtoi presidenti ukrainas.