Në kuadër të turit ‘Punët e Shqipërisë’, Rama pati ndalesën e radhës këtë të shtunë në Dibër. Gjatë Asamblesë së Partisë Socialiste, ai solli në vëmendje procesin e integrimit europian të Shqipërisë dhe sfidat që duhen ndërmarrë me qëllim adaptimin me kriteret e BE për çdo sektor. ‘Punët e Shqipërisë” po shkojnë në drejtimin e duhur, “Punët e Shqipërisë” po vazhdojnë pa ndalim dhe “Punët e Shqipërisë” të një dekade po fillojnë të japin gjithmonë e më shumë rezultate të prekshme. Ndërkohë që, misioni ynë kombëtar si socialistë dhe si socialiste, që është misioni për ta çuar Shqipërinë dhe për ta ulur në tryezën e përbashkët të Europës, është sot në fazën e vet finale dhe kjo është një fazë e vështirë. Kjo është një fazë që kërkon një angazhim shumë të madh.’ Kryeministri Rama theksoi një proces të tillë mund ta cojë përpara vetëm Partia Socialiste, duke bërë thirrje për të qëndruar të bashkuar për këtë mision kombëtar. ‘Dua t’ju them që ne jemi në kushtet kur si Parti Socialiste kemi konsoliduar forcën tonë, jemi një forcë hegjemonë në politikën shqiptare. Duhet të qëndrojmë të tillë sepse vetëm Partia Socialiste mund ta kryejë këtë mision kombëtar. Asnjë forcë tjetër politike, asnjë forcë tjetër pseudopolitike, asnjë lloj force tjetër rreth e rrotull politikës, nuk ka kapacitetin ta bëjë këtë nëse nuk e bën Partia Socialiste e Shqipërisë.’ Ndër të tjera kreu i qeverisë Rama u shpreh se nuk ka ndodhur në asnjë vend, që opozita të kërkojë bllokimin e vendit të tyre në anëtarësimin në BE, pavarësisht problemeve të brendshme politike.