Të paktën 18 persona humbën jetën pasi një avion u rrëzua dhe mori flakë ndërsa po ngrihej nga pista në kryeqytetin e Nepalit, Katmandu, të mërkurën. Piloti, i cili aktualisht po merr trajtim në spital, është i vetmi i mbijetuar nga aksidenti fatal. Rreth 19 persona ishin në fluturimin testues të Saurya Airlines, duke përfshirë pjesëtarë të stafit teknik të linjës ajrore dhe dy anëtarë të ekuipazhit. Avioni ishte nisur për në Pokhara, një destinacion popullor turistik. Videot e postuara në internet treguan se avioni ishte i mbështjellë me flakë dhe tym. Pas aksidentit në vendngjarje kanë mbërritur zjarrfikëse dhe ambulanca. Incidenti ndodhi rreth orës 11:15 sipas orës lokale, disa minuta pasi avioni u ngrit nga Aeroporti Ndërkombëtar Tribhuvan, sipas një deklarate nga qendra koordinuese e kërkim-shpëtimit e Autoritetit të Aviacionit Civil të Nepalit. Në deklaratë thuhet se avioni "u kthye djathtas dhe u rrëzua në anën lindore të pistës". “U raportua se zjarri është vënë nën kontroll dhe puna e shpëtimit ka nisur menjëherë”, thuhet në njoftim. “U gjetën trupat e pajetë të 18 personave dhe një i plagosur u shpëtua dhe u dërgua në spital”. Një zyrtar i aeroportit tha se "disa kërcitjeje ishin dëgjuar " nga avioni. Nepali është kritikuar për rekordin e tij të dobët të sigurisë ajrore. Në janar 2023, të paktën 72 njerëz humbën jetën në një aksident të Yeti Airlines që më vonë iu atribuua pilotëve që gabimisht ndërprenë energjinë elektrike. Saruya Airlines kryen fluturime në pesë destinacione brenda Nepalit, me një flotë prej tre avionësh Bombardier CRJ-200, sipas faqes së internetit të kompanisë.