Kryeministri i ri i Francës, Sebastien Lecornu, dha dorëheqjen të hënën, pa u mbushur mirë 14 orë pasi emëroi kabinetin e tij të ri, pasi aleatët dhe armiqtë kërcënuan të rrëzonin qeverinë e tij, duke ulur ndjeshëm aksionet franceze në bursa dhe duke zhvlerësuar euron. Dorëheqja e tij e shpejtë ishte e papritur dhe e paprecedentë dhe shënoi një tjetër thellim të krizës politike të Francës. Tubimi Kombëtar i ekstremit të djathtë i kërkoi menjëherë Presidentit Emmanuel Macron të thërriste zgjedhje të parakohshme parlamentare. Pas javësh konsultime me partitë politike në të gjitha nivelet, Lecornu, një aleat i ngushtë i Macron, kishte emëruar ministrat e tij të dielën dhe ata ishin gati të mbanin takimin e tyre të parë të hënën pasdite. Por përbërja e re e kabinetit kishte zemëruar kundërshtarët dhe aleatët, të cilët ose e konsideruan atë shumë të djathtë ose jo mjaftueshëm të tillë, duke ngritur pikëpyetje se sa mund të zgjaste, në një kohë kur Franca është tashmë e zhytur thellë në krizë politike, pa asnjë grup që mban shumicën në një parlament të fragmentuar. Lecornu ia dorëzoi dorëheqjen e tij Macronit të hënën në mëngjes.