E vetmja forcë politike që ju përgjigj pozitivisht ftesës së kryeministrit në detyrë, Albin Kurti për t’u takuar për krijimin e institucioneve të reja, është Lidhja Demokratike e Kosovës. Zëdhënësi i LDK-së, Besian Mustafa konfirmoi për mediat lokale se këtë të martë në orën 18, do të zhvillohet një takim në Kuvendin e Kosovës mes kryetarit të Lidhjes Demokratike, Lumir Abdixhiku dhe kryetarit të Vetvendosjes, Albin Kurti. Ndërkohë pas përgjigjes refuzuese të kreut të AAK-së, Ardian Gjini, po njësoj ka vepruar edhe Bedri Hamza i Partisë Demokratike të Kosovës, i cili përmes një letre i ka mbyllur Kurtit urat e komunikimit për krijimin e institucioneve të reja të Kosovës. Në letrën që mban firmën e Bedri Hamzës thuhet: “Duke iu referuar takimit tonë të datës 10 korrik dhe qëndrimit publik të PDK-së, ju rikonfirmoj se, në rrethanat aktuale, qëndrimi ynë është që të vazhdojmë të qëndrojmë në opozitë. Presim nga ju që në përputhje me përgjegjësitë që ju burojnë nga zgjedhjet e 7 qershorit, së bashku me partitë e tjera të përfaqësuara në Kuvendin e Kosovës, të arrini marrëveshje për krijimin e institucioneve të reja të vendit.” - thuhet në përgjigjen e Hamzës.