Vetëm një marrëveshje armëpushimi në Gaza, që do të vijë nga bisedimet e kësaj jave, do të ndalonte hakmarrjen e iranit kundër Izraelit për vrasjen e liderit të Hamasit, Ismail Haniyeh në tokën e tij, thanë tre zyrtarë të lartë iranianë. Irani është zotuar për një përgjigje të ashpër ndaj vrasjes së Haniyeh, e cila ndodhi ndërsa ai vizitoi Teheranin në fund të muajit të kaluar dhe për të cilën vendi islamik fajësoi Izraelin. Izraeli nuk e ka konfirmuar apo mohuar përfshirjen e tij. Një nga burimet, një zyrtar i lartë i sigurisë iraniane, tha se Irani, së bashku me aleatët si Hezbollahu, do të ndërmarrin një sulm të drejtpërdrejtë mbi Izraelin nëse bisedimet në Gaza dështojnë ose nëse do të perceptohet se Tel Avivi po zvarrit negociatat. Burimet nuk thanë se sa kohë Irani do të lejonte përparimin e bisedimeve përpara se të përgjigjej. Me një rrezik në rritje të një lufte më të gjerë në Lindjen e Mesme pas vrasjes së Haniyeh dhe komandantit të Hezbollahut Fuad Shukr, Irani është përfshirë në dialog intensiv me vendet perëndimore dhe Shtetet e Bashkuara ditët e fundit mbi mënyrat për e kalibrimit të hakmarrjes, thanë burimet që folën në kushte anonimiteti për shkak të ndjeshmërisë së çështjes. Në komentet e publikuara të martën, ambasadori amerikan në Turqi konfirmoi se Uashingtoni po u kërkonte aleatëve të ndihmonin për të bindur Iranin që të ulë tensionet.