Mbështetja ushtarake e perëndimit ka qenë thelbësore për Kievin edhe është rritur shumë gjatë luftës. Para pushtimit, edhe vetëm ideja e dërgimit të ndihmave ushtarake në Ukrainë ishte shumë e diskutueshme por furnizimet perëndimore që atëherë kanë thyer tabu pas tabuje. “Ata nuk donin të na jepnin artileri të rëndë, më pas e bënë këtë. Nuk donin të na jepnin sistemet HIMARS, pastaj na i dhanë. Nuk donin të na jepnin tanket, tani po na i japim. Përvec armëve bërthamore, nuk ka mbetur më asgjë që nuk na kanë dhënë”, thotë Juri Sak, një këshilltar i ministrisë ukrainase të mbrojtjes. Ukraina, që po i afrohet vitit të plotë nën pushtim rus, ka thënë edhe se do të donte të merrte edhe raketa me rreze të gjatë veprimi nga perëndimi. Moska ka reaguar me zemërim një ditë më parë, pasi gjermania dhe SHBA konfirmuan planet për dërgimin e tankeve në fushëbetejë, një vendim ky që do të forcojë ndjeshëm fuqinë sulmuese të Ukrainës. Tani, pas sigurimit të tankeve të betejës, Kievi ka kthyer sytë nga raketat me rreze të gjatë veprimi dhe avionët ushtarakë perëndimorë. E ndërsa për avionët, nuk ka ende ndonjë lëvizje konkrete, për raketat me rreze të gjatë veprimi duket se po bëhet dicka. Britania e madhe, së fundmi tha se mund ti sigurojë ukrainës raketat kruiz Harpoon me rreze të gjatë veprimi. Marina mbretërore do të nxjerrë nga stoku një numër armësh të tilla këtë vit, përfshirë Harpoonët. Këto raketa kanë një rreze maksimale veprimi prej 240 kilometrash, gjashtë herë më shumë se ajo e raketave GMLRS që britania ka dërguar në kiev deri më tani. Ajo që ka frenuar perëndimin, në dërgimin e raketave me rreze të gjatë veprimi, është frika se mos Kievi mund të godasë brenda në rusi e nëse kjo ndodh me armë perëndimore, lufta do të përshkallëzohej shumë...