Administrata e presidentit amerikan Joe Biden përgjysmoi numrin e të burgosurve në qendrën e paraburgimit bë Gjirin e Guantanamos në Kubë, duke dërguar 11 të burgosur në Oman. Ushtria amerikane tha se vetëm 15 të burgosur mbeten atje pas transferimit, ndërkohë që administrata e Bidenit ka tentuar të ecë drejt mbylljes së objektit. Qendra e paraburgimit u hap për herë të parë më 11 janar 2002 nga Presidenti George Ë. Bush për të mbajtur atje të dyshuarit për terrorizëm dhe "luftëtarët e paligjshëm armiq" gjatë "Luftës kundër Terrorit" të nisur nga SHBA pas sulmeve të 11 shtatorit 2001, në Nju Jork dhe Uashington. Gjiri i Guantanamos strehoi afërsisht 680 të burgosur në kulmin e tij në vitin 2003, sipas të dhënave të Pentagonit. Transferimi i fundit i 11 të burgosurve, të gjithë nga Jemeni, e lë bazën detare të SHBA-së në Kubë me numrin më të vogël të të burgosurve që nga hapja e saj. Nga 15 të arrestuarit e mbetur, Pentagoni tha se tre kanë të drejtë për transferim dhe po aq kanë të drejtë të dalin para një bordi që do të rishikojë cështjet e tyre. Pjesa tjetër janë akuzuar ose dënuar për krime lufte. Burgu i Guantanamos është kritikuar prej kohësh nga grupet e të drejtave të njeriut dhe avokatët ligjorë për shkelje të mundshme të rregullave ndërkombëtare.