Kryeministri Edi Rama ka reaguar sërish duke shënjestruar edhe njëherë magjistratët lidhur me çështjen e pagave. Në një postim në X, kreu i qeverisë publikoi një foto me rrogat që marrin gjyqtarët në Ballkan. Në listën e nxjerrë nga kreu i qeverisë, aktualisht gjyqtarët shqiptarë janë në vendin e dytë, pas atyre rumunë sa i takon pagës, por me rritjet që KLP e KLGJ miratuan në muajin korrik, pas vendimit të Kushtetueses, togat e zeza shkojnë të parët në listë me 4886 euro. Një gjykatës fillestar sot në Shqipëri merr 500 Euro pagë më të lartë se sa kolegu në Greqi dhe me vendimin e marrë vetë Zot vetë Shkop, paga duhet të rritet 2000 Euro më shumë në muaj se sa kolegu grek dhe 3000 Euro më shumë se sa kolegu në Malin e Zi… Ngërçi ka krijuar përplasje, pasi minsitria e Financave ka urdhëruar thesarin që të mos kaloj pagesat e muajit gusht me ndryshimet e miratuara nga KLGJ e KLP. Në disa gjykata është bojkotuar puna, ndërsa Adminsitrativja i ka dhënë të drejtë gjyqtarëve duke vendosur për zhbllokimin e pagave. Ministri i Financave, Petrit Malaj ka bërë me dije se ka zbatuar Kushtetutën dhe ligjin, kurse gjyqtarëtët e prokurorët kanë dorëzuar kallëzim penal në SPAK. Qeveria ka njoftuar se do të miratoj formulën e re të pagave në seancën e 17 shtatorit.