Një ditë pas betimit më 6 gusht, edhe pse Kuvendi I Kosovës për më shumë një muaj nuk zhvilloi punë parlamentare, gati gjysma e deputetëve angazhuan ndihmës personalë që në ditët e para pas betimit. Gjatë kësaj periudhe deri më 13 shtator, Kuvendi ishte i bllokuar në procesin e konstituimit dhe nuk mbajti seanca pune për shqyrtimin e ligjeve apo çështjeve të tjera të agjendës parlamentare. Nga gjithsej 120 deputetë sa ka Kuvendi, 52 prej tyre, deri më 11 shtator, kishin ushtruar të drejtën për të angazhuar asistentë. sipas të dhënave të siguruara nga organi legjislativ, 12 deputetë u bënë me ndihmës më 7 gusht, një ditë pas betimit të tyre. Pjesa tjetër angazhuan asistentë ditëve të tjera të gushtit dhe gjatë shtatorit. sipas Kuvendit, paga e një asistenti personal, është 972.4 euro bruto, pa përfshirë shtesën për përvojën e punës. Sipas përllogaritjes, për një muaj asistentët do t’i kushtojnë buxhetit të shtetit mbi 50 mijë e 500 euro.