Që prej datës 20 korrik Shqipëria ka shënuar shifra të frikshme të kriminalitetit në vend. Nuk bëhet fjalë për vepra penale të lehta, por nga ato që sjellin pasoja të rënda për rendin dhe sigurinë publike. Në Elbasan, Tiranë, Fier, Gjirokastër e Vlorë ka pasur vrasje e plagosje, në shumë raste të lidhura mes tyre. Këto janë vetëm pak raste të krimeve që kanë ndodhur në harkun kohor të pak ditëve, por shumë më shumë kanë ndodhur që nga qershori. Por përse në sezone të caktuara sikurse gjatë verës, kurba e kriminalitetit rritet? Specialistë të ndryshëm i referohen studimeve ndërkombëtare, por edhe librit "Kriminologji" që studiohet nga juristët, ku thonë se mes faktorëve nxitës llogariten edhe temperaturat e larta. Pranohen ndikimi i temperaturave të larta jo për të gjitha llojet e veprave penale, por për një pjesë të veprave penale që lidhen me pasurinë, dhe me krimet e dhunshme, siç mund të jenë zënkat, rrahjet, plagosjet dhe vrasjet.