Kryeministri i Kosovës, Avdullah Hoti reagoi ndaj ngjarjeve të një dite më parë në Kosovë duke thënë se lëvizjet e Dhomave të Specializuara duhen konsideruar si veprime “të pavarura të drejtësisë”. Zyra e Prokurorit të Specializuar sqaroi se zyrtarët e Misionit Europian për Sundimin e Rendit dhe Ligjit (EULEX), dhanë mbështetje operative dhe logjistike për bastisjen e zyrave të Organizatës së Veteranëve të Luftës së UÇK-së, ku u arrestua kreu i kësaj organizate, Hysni Gucati, ndërsa nënkryetari Nasim Haradinaj, u shoqërua nga pjesëtarët e EULEX-it dhe Policisë së Kosovës. Përmes një postimi në Facebook, kryeministri Hoti e bëri të qartë se Qeveria e Kosovës beson se drejtësia është mbi të gjitha, dhe sipas tij, duhet respektuar plotësisht. “ po ashtu, shtoi ai, ekzekutivi kosovar e njeh si të patjetërsueshëm qëllimin e pastër e të shenjtë të popullit të Kosovës në luftën për liri”. Gjykata Speciale e Kosovës përbëhet nga Dhomat e Specializuara dhe Zyra e Specializuar e Prokurorisë në Hagë, një institucion I formuar me këmbënguljen e bashkësisë ndërkombëtare dhe I financuar kryesisht nga Bashkimi Evropian.Gjykata u krijua me vendim të Kuvendit të Kosovës pas raportit të Këshillit të Europës, të vitit 2011, në të cilin senatori zviceran, Dick Marty, fliste për krimet e pretenduara "të pjesëtarëve të UCK-së ndaj pakicave etnike dhe rivalëve politikë“, që nga janari i vitit 1998 e deri në dhjetor të vitit 2000.