Tajvani do të vendosë raketa Himars të prodhuara në SHBA në dy ishuj pranë Kinës për të kundërshtuar kërcënimin që paraqet Pekini. Sistemet raketore artilerie me lëvizshmëri të lartë ose Himars, do të vendosen së shpejti në Ishujt Penghu, një arkipelag pranë ishullit kryesor të Tajvanit, si dhe në Dongyin, ishullin më verior të Tajvanit, i cili është më pak se 50 km larg bregdetit të Kinës. Vendosja e raketave vjen përpara një samiti mes presidentit kinez Xi Jinping dhe Donald Trump, ku çështja e Tajvanit dhe aftësive të tij mbrojtëse ka të ngjarë të jetë në krye të axhendës. Vendosja e Himars-ëve në këto ishuj ka si qëllim parësor krijimin e një "zone të vdekur" në të cilën Ushtria Çlirimtare Popullore e Kinës do të kishte frikë të hynte, tha një burim ushtarak. Kina e konsideron Tajvanin si pjesë të territorit të saj, pavarësisht kundërshtimit të fortë nga qeveria në Taipei, dhe nuk e ka përjashtuar përdorimin e forcës për ta vënë ishullin nën kontrollin e saj. Taipei mori grupin e parë të raketave Himars nga SHBA në vitin 2024 dhe duhet të ketë gjithsej 111 njësi. Ai po ashtu mendohet të ketë më shumë se 500 sisteme raketash taktike ushtarake, ATACMS. Këto raketa të drejtuara tokë-tokë kanë një rreze veprimi deri në 300 km.