Qëndrimi i prerë i socialistëve se nuk ulen kategorikisht në tryeza negociuese me ‘non gratat’, po përballet tashmë me një sfidë të madhe. Në mesin e grupit parlamentar të Partisë Socialiste, gjendet një deputet, i cili si pasojë e sanksioneve të vendosura ndaj të atit, tashmë është pjesë familjarisht e listës së zezë së Shteteve të Bashkuara të Amerikës. Ornaldo Rakipi, një emër pa asnjë të shkuar politike, bëri bujë me thyerjen e herësit në zgjedhjet e 25 prillit, ku u rendit i dyti për nga numri i votave pas Fatmir Xhafajt. Bazuar në formularin e dekriminalizimit dhe pasurisë së familjes së Aqif Rakipit, pranë ILDPKI, rezulton se pavarësisht bllokimit të pasurive në SHBA, ata janë pronarë të një sërë pasurive të paluajtshme, automjetesh dhe llogarive bankare në Shqipëri. Në jetëshkrimin e deputetit Ornaldo Rakipi, bie në sy se ende pa përfunduar studimet në fakultetin e ekonomisë ‘Aleksandër Xhuvani’ në Elbasan, aso kohe vetëm 22 vjeç, Rakipi emërohet menaxher e më pas drejtor, për të veshur vetëm pak vite më vonë edhe kostumin e deputetit në moshën 28 vjeçare.