Nga foltorja e radhës para Kryeministrisë, kreu i PD Sali Berisha ngriti sërish shqetësimin për çmimin e naftës dhe përsëriti se ulja e akcizës nga qeveria është mashtrim sipas tij. “Këto kohë nafta nga bordi i tij ka arritur nivelet më të larta në botë, 220 lekë. Mashtruesi deklaron se po u rrit mbi këtë nivel, do të ulë me 8 lekë akcizën. Nuk është asgjë. Por problemi është se gjer në këtë nivel, rritja e TVSH-së është mbi 8 lekë dhe nuk kthen asnjë qindarkë. Problemi është se ky njeri ka vendosur mbi litrin e naftës, barrën fiskale më të lartë në botë. Kush të dojë, të kërkojë në Google, vendi me barrën fiskale mbi naftën më të lartë në Europë, Shqipëria del” Sali Berisha pretendon se 15 vende anëtare të Bashkimit Europian do ta pengojnë Shqipërinë në rrugën e saj drejt unionit. Sipas kreut të PD-së, kryeministri Edi Rama nuk po u thotë qytetarëve shqiptarë të vërtetëm për procesin e integrimit.