Këshilli i Lartë i Prokurorisë ka mbajtur këtë të martë, mbledhjen plenare të radhës përmes platformës on-line, në respektim të masave anti covid. Në këtë mbledhje KLP ka miratuar disa emërime të përkohshme të disa prokurorëve si dhe drejtuesve të prokurorive. Ndër më të rëndësishme janë emërimi i prokurorit Genti Xholi përkohësisht drejtues i Prokurorisë pranë Gjykatës së Apelit Tiranë. Po kështu drejtues i prokurorisë pranë Gjykatës së Apelit Shkodër, caktohet përkohësisht prokurori Brahim Dragjoshi, ndërsa në Apelin e Durrësit do të jetë në krye të Prokurorisë, Ludovik Doda. Gjithashtu janë emëruar edhe disa drejtues të përkohshëm të prokurorive pranë gjykatave të shkallëve të para; si në Sarandë u vendos Lorenc Mërkuri, në Vlorë, Erion Çela dhe në Përmet, Asllan Bajramaj. Po në këtë mbledhje Këshilli miratoi listën pjesore të 22 kandidatëve për t’u pranuar në Programin e Formimit Fillestar të Shkollës së Magjistraturës, në vitin akademik 2020-2021.