Autoritetet e Guatemalës paralajmëruan popullsinë për rrezikun e "aktivitetit shpërthyes" nga vullkanet Fuego dhe Santiaguito, të cilët janë ndër vullkanet më aktive në vend. Në përgjigje të aktivitetit vullkanik, autoritetet shpallën një alarm portokalli të enjten, i cili "aktivizon planet e reagimit" dhe çoi në "monitorim të intensifikuar". Kjo u pasua nga një alarm i kuq. Vullkani Fuego konsiderohet më aktivi në Amerikën Qendrore, me një lartësi prej 3,763 metrash dhe i vendosur 35 kilometra larg nga Qyteti i Guatemalës, ndërsa Santiaguito, në lartësinë 2,500 metra, ndodhet 206 kilometra në perëndim të kryeqytetit. Të dy kanë shpërthyer ditët e fundit duke lëshuar re hiri në qiell. Lidhur me vullkanin Fuego, autoritetet rekomanduan "marrjen në konsideratë të shpërndarjes së hirit" brenda një rrezeje prej 15 deri në 40 kilometra, në lindje dhe verilindje. Sipas zyrtarëve, aktiviteti i këtij vullkani po shoqërohet me "shpërthime të përsëritura që variojnë nga të dobëta deri në të moderuara". Më 3 qershor 2018, vullkani Fuego shkaktoi një ortek materiali përvëlues që përfshiu qytetin e San Miguel Los Lotes, duke lënë 215 të vdekur dhe një numër të përafërt të zhdukurish. Ndërsa vullkani Santiaguito, vazhdon të nxjerrë llavë dhe ortekë rrjedhash piroklastike në disa drejtime. Shpërthimi më i madh i Santiaguitos ndodhi në vitin 1929, kur mbetën të vrarë rreth 2,500 njerëz. Janë paralajmëruar ndërkohë edhe agjencitë turistike për rreziqet e ngjitjes dhe qëndrimit në zonat e afërta me vullkanet.